UShAF tashmë është Universitet i pavarur

Universiteti i Shkencave të Aplikuara në Ferizaj (UShAF) tashmë është pavarësuar zyrtarisht nga Universiteti “Hasan Prishtina” në Prishtinë, pas nënshkrimit të Memorandumit të Mirëkuptimit që rregullon të gjitha çështjet e shkëputjes përfundimtare nga ky Universitet.

Memorandumi i nënshkruar nga ministri i Arsimit, z. Arsim Bajrami, rektori i UShAF-it, z. Agron Bajraktari dhe rektori i Universitetit të Prishtinës “Hasan Prishtina”, z. Marjan Dema, rregullon çështjen e lëvizjes së stafit akademik, statusit të punëtorëve administrativ, statusit të studentëve, buxhetit dhe çështje të tjera të rëndësishme për funksionimin e Universitetit.

Gjatë ceremonisë së nënshkrimit të Memorandumit, ministri Bajrami tha se tani ka ardhur koha që universiteti më i ri publik në Kosovë të konsolidohet dhe të pavarësohet, në mënyrë që të marrë të gjitha përgjegjësitë në aspektin akademik, menaxheriale dhe atë financiar.

Rektori i UShAF, Prof.Dr. Agron Bajraktari tha se është shumë i rëndësishëm ky Memorandum, sepse hapë rrugën drejt zhvillimit të Universitetit.

Rektori Bajraktari tha se megjithatë, si universitet i ri dhe i vetmi i profilizuar në vend, ka nevojë për ndihmën e të gjithëve, në mënyrë që të nxjerrë kuadra të përgatitura mirë për tregun e punës dhe të bëhet lider në rajon e më gjerë për profilet që ofron.
Ndërsa, rektori i Universitetit “Hasan Prishtina”, Prof. Dr. Marjan Dema theksoi gatishmërinë që ky universitet të ndihmojë edhe më tutje UShAF-in gjatë konsolidimit të tij, sidomos në plotësimin e nevojave me staf akademik.