SKANDAL INSTITUCIONAL: TRE ANËTARË TË KËSHILLIT DREJTUES TË DELEGUAR NGA MINISTRIA MBAJNË “MBLEDHJE” PA KUORUM DHE NË KUNDËRSHTIM ME STATUTIN E USHAF

Rektori: asnjë organ universitar nuk mund të funksionojë jashtë statutit, universiteti do të kërkojë përgjegjësi ligjore
Universiteti i Shkencave të Aplikuara në Ferizaj (UShAF) denoncon publikisht një veprim jashtëzakonisht serioz të Kryesuesit të Këshillit Drejtues, Ramadan Beqiri, dhe dy anëtarëve të tjerë të Këshillit Drejtues të emëruar nga Ministria e Arsimit, Shkencës, Teknologjisë dhe Inovacionit, Ilmi Reçica dhe Alban Maliqi.
Sipas dokumentacionit të protokolluar në Universitet, më 11 shtator 2026, në ora 14:00, këta tre persona kanë zhvilluar një mbledhje të pretenduar të Këshillit Drejtues, ndonëse, sipas dispozitave statutare të cituara më poshtë, nuk ka ekzistuar kuorumi i nevojshëm prej katër anëtarësh dhe nuk është respektuar procedura për përcaktimin e rendit të ditës në pajtim me Rektorin. Ky veprim ngre çështje serioze lidhur me ligjshmërinë e procedurës, kompetencat e personave të përfshirë dhe respektimin e autonomisë së Universitetit.

Faktet janë të qarta: tre anëtarë nuk janë këshilli drejtues
Këshilli Drejtues i UShAF përbëhet nga shtatë anëtarë.
Paragrafi 2 i nenit 19 të Statutit të UShAF përcakton qartë: “Për mbajtjen e mbledhjeve të Këshillit Drejtues nevojitet kuorumi prej katër (4) anëtarëve.”
Megjithatë, më 11 shtator 2026, mbledhja e pretenduar është zhvilluar nga vetëm tre persona:

• Ramadan Beqiri – Kryesues i Këshillit Drejtues;
• Ilmi Reçica – Zëvendëskryesues;
• Alban Maliqi – Anëtar.

Pra, nga shtatë anëtarët e Këshillit Drejtues, në mbledhjen e pretenduar kanë marrë pjesë vetëm tre. Katër anëtarë kërkohen për kuorum. Tre anëtarë nuk e përmbushin këtë kusht. Kjo nuk është çështje interpretimi politik. Është një kërkesë e shprehur në mënyrë të qartë në Statutin e Universitetit. Për këtë arsye, UShAF konteston ligjshmërinë e çdo vendimi që pretendohet se është marrë në një mbledhje ku nuk ka ekzistuar kuorumi i përcaktuar me Statut.

Edhe rendi i ditës është proceduar në kundërshtim me statutin
Shkelja e pretenduar nuk kufizohet vetëm te mungesa e kuorumit.
Paragrafi 8 i nenit 19 të Statutit të UShAF përcakton: “Rendi i ditës për takimet e Këshillit Drejtues propozohet nga kryesuesi në pajtim me Rektorin.”
Të njëjtën kërkesë e përcakton edhe paragrafi 9 i nenit 6 të Rregullores së Punës së Këshillit Drejtues të UShAF nr. 144/21, datë 25.01.2021: “Rendi i ditës për takimet e KD propozohet nga kryesuesi, në pajtim me Rektorin.” Këto dispozita janë të qarta.
Rendi i ditës nuk mund të përcaktohet duke e anashkaluar Rektorin dhe procedurën e përcaktuar në aktet juridike të Universitetit. Në rastin konkret, procedura është zhvilluar pa u respektuar kjo kërkesë statutare dhe rregullative. Për më tepër, në kohën kur është thirrur dhe zhvilluar kjo mbledhje, Rektori i UShAF, Prof. Dr. Agron Bajraktari, ndodhej jashtë Republikës së Kosovës në një konferencë ndërkombëtare. Kjo rrethanë nuk i jep askujt të drejtën të anashkalojë Statutin.

Kjo nuk është thjeshtë një mosmarrëveshje procedurale
Menaxhmenti i UShAF e konsideron këtë situatë si një çështje shumë më të rëndë sesa një mosmarrëveshje rreth procedurës së një mbledhjeje. Bëhet fjalë për respektimin e: autonomisë së Universitetit, Statutit të Universitetit, Rregullores së Punës së Këshillit Drejtues, kompetencave të organeve universitare dhe parimit të ligjshmërisë në ushtrimin e funksioneve publike.
Këshilli Drejtues është organ kolegjial. As kryesuesi dhe as tre anëtarë të tij nuk mund ta zëvendësojnë vullnetin e organit kolegjial kur nuk ekziston kuorumi i përcaktuar me Statut. Një mbledhje pa kuorum nuk mund të shndërrohet me vullnetin e tre personave në një mbledhje të rregullt të Këshillit Drejtues.

Pyetja që kërkon përgjigje: ku është autonomia universitare?
UShAF kërkon përgjigje edhe për një çështje më të gjerë institucionale: A po përdoren anëtarët e Këshillit Drejtues të emëruar nga Ministria si instrument për ndërhyrje në autonominë e Universitetit? Tre anëtarët në fjalë janë emëruar nga Ministria e Arsimit. Kjo nuk do të thotë se ata mund të veprojnë si përfaqësues politikë të Ministrisë brenda Universitetit. Pasi emërohen në Këshillin Drejtues, ata duhet të veprojnë në përputhje me ligjin, Statutin dhe rregullat që përcaktojnë funksionimin e këtij organi. Ministria mund të delegojë përfaqësues, por nuk mund ta zëvendësojë Këshillin Drejtues.
Dhe askush nuk mund ta përdorë pozitën e anëtarit të Këshillit Drejtues për të krijuar një mekanizëm paralel vendimmarrës jashtë Statutit.

Veprimet do të kërkojnë vlerësimin e organeve kompetente
UShAF nuk do ta pranojë si fakt të kryer asnjë vendim të pretenduar si vendim i Këshillit Drejtues nëse ai është marrë në një proces që nuk ka përmbushur kushtet statutare për zhvillimin e mbledhjes.
Universiteti do të kërkojë nga gjykata dhe organet e tjera kompetente që të vlerësojnë: ligjshmërinë e thirrjes së mbledhjes; respektimin e procedurës për përcaktimin e rendit të ditës; ekzistimin ose jo të kuorumit; kompetencën e personave për të marrë vendime në emër të Këshillit Drejtues në rrethanat konkrete; ligjshmërinë dhe vlefshmërinë e çdo akti apo vendimi të nxjerrë në atë mbledhje; dhe, nëse konstatohen elementet përkatëse, përgjegjësinë individuale të personave të përfshirë.
Në këtë kontekst, UShAF do t’ua lërë organeve kompetente të drejtësisë vlerësimin nëse veprimet konkrete me dashje dhe të qëllimshne  përbëjnë elemente të ndonjë vepre penale, përfshirë edhe çështjet që lidhen me keqpërdorimin e detyrës zyrtare dhe tejkalimin e kompetencave, sipas legjislacionit penal në fuqi.

Një dokument zyrtar ngre edhe një çështje tjetër serioze
Në dokumentacionin e protokolluar në Universitet lidhur me këtë proces, z. Ilmi Reçica është paraqitur si “sekretar”, ndërkohë që, sipas strukturës së Këshillit Drejtues, ai mban pozitën e zëvendëskryesuesit.
UShAF e konsideron këtë një çështje që duhet të sqarohet dhe të verifikohet në mënyrë institucionale, veçanërisht kur bëhet fjalë për dokumentacion që lidhet me një mbledhje të kontestuar për mungesë kuorumi dhe parregullsi procedurale.

Më 14 shtator 2026, universiteti do të ndërmarrë hapa ligjorë
Universiteti i Shkencave të Aplikuara në Ferizaj do të ndërmarrë më 14 shtator 2026 hapat juridikë pranë gjykatës kompetente lidhur me veprimet e ndërmarra në kuadër të kësaj mbledhjeje. UShAF do të kërkojë mbrojtjen e autonomisë së tij institucionale dhe shqyrtimin gjyqësor të ligjshmërisë së veprimeve të kryera.

Askush nuk mund ta vendosë Universitetin para faktit të kryer.
Nëse dikush mendon se mund të anashkalojë Statutin, të mbajë mbledhje pa kuorum dhe pastaj t’i paraqesë vendimet e veta si vendime të Këshillit Drejtues, do të përballet me reagimin institucional dhe juridik të Universitetit.

Mesazh i drejtpërdrejtë për ministrin dhe përfaqësuesit e ministrisë
Rektori dhe menaxhmenti i UShAF i bëjnë të qartë Ministrisë së Arsimit: Universiteti nuk është institucion që mund të drejtohet përmes urdhrave politikë. Këshilli Drejtues nuk është mekanizëm për ndërhyrje politike. Statuti i Universitetit nuk është dokument që mund të respektohet vetëm kur i konvenon dikujt.
Dhe mbi të gjitha:
Autonomia e universitetit nuk do të lejohet të shkelët.
Çdo ndërhyrje në funksionimin e ligjshëm të Universitetit do të dokumentohet, do të kundërshtohet dhe, kur është e nevojshme, do të dërgohet për shqyrtim pranë organeve kompetente. UShAF nuk kërkon privilegje. Kërkon respektimin e ligjit. Nuk kërkon që dikush të jetë mbi ligjin. Kërkon që askush të mos jetë mbi Statutin dhe aktet tjera përcjellëse.
UShAF nuk do të lejojë që vullneti i tre personave të zëvendësojë vullnetin e një organi prej shtatë anëtarësh. Tre anëtarë nuk janë shtatë. Tre anëtarë nuk krijojnë kuorum. Një mbledhje pa kuorum nuk mund të trajtohet si mbledhje e rregullt e Këshillit Drejtues.
Autonomia universitare nuk mund të zëvendësohet me ndërhyrje politike.