UShAF nënshkruan Marrëveshje Bashkëpunimi me Fabrikën e Mobileve ‘’Bliri-Mob’’ në Ferizaj

Universiteti i Shkencave të Aplikuara në Ferizaj (UShAF), vazhdon të sigurojë mundësi të reja për nxjerrjen e kuadrove për tregun e punës, duke bashkëpunuar me bizneset kosovare. Në këtë drejtim, rektori i UShAF, Prof. Dr. Agron Bajraktari ka nënshkruar sot Marrëveshje Bashkëpunimi me Fabrikën e Mobileve ‘’Bliri-Mob’’ në Ferizaj.

Me këtë rast, rektori Bajraktari u shpreh i kënaqur që për studentët e UShAF po krijohen çdo ditë kushte më të mira për aftësim praktik – profesional dhe bashkëpunim reciprok. Po ashtu, rektori njoftoj se tani e tutje përfaqësuesi i kompanisë do të jetë anëtar i Bordit Industrial të UShAF dhe do të involvohet në proceset e hartimit të plan-programeve sipas kërkesave të tregut, sepse sipas tij interesi do të jetë i dyanshëm.

Ndërsa, drejtori gjeneral i Fabrikës së Mobileve, z. Rrahim Sejdiu, u shpreh i kënaqur që do të ketë mundësinë që të bashkëpunojë me studentët dhe profesorët e UShAF dhe të shkëmbëjë përvojat me ta. Po ashtu, premtoj se së shpejti një student i UShAF do të punësohet në Fabrikën të cilën e përfaqëson ai.

Kompania përveç që krijon mundësinë për punën praktike të studentëve, do të ketë në dispozicion kuadrin akademik të Universitetit, për zgjidhjen e problemeve praktike dhe shkencore që mund të ketë ajo.