UShAF lidhë Marrëveshje Bashkëpunimi me Ndërmarrjen hoteliere “Hotel Garden”, në Prishtinë

Universiteti i Shkencave të Aplikuara në Ferizaj (UShAF) ka nënshkruar Marrëveshje Bashkëpunimi me Ndërmarrjen hoteliere “Hotel Garden”, në Prishtinë.

Qëllimi i Marrëveshjes është që studentët e Fakultetit të Turizmit dhe Ambientit të realizojnë punën praktike në fushën e menaxhimit, si dhe zhvillimin e temave të diplomës në këtë Ndërmarrje, po ashtu edhe angazhimin e stafit akademik të UShAF në zgjidhjen e problemeve praktike shkencore të Ndërmarrjes.

Rektori i UShAF, Prof. Dr. Agron Bajraktari falënderoj pronarin e Ndërmarrjes hoteliere për pritjen dhe gatishmërinë e nënshkrimit të Marrëveshjes dhe tha se për studentët është shume e nevojshme puna praktike, sepse sipas tij vetëm në këtë mënyrë ata do të kompletohen në profesionin e tyre dhe do të jenë të gatshëm për tregun e punës. Po ashtu, Rektori së bashku me stafin e tij përgëzuan pronarin e kësaj Ndërmarrje dhe mbetën të kënaqur për shërbimet profesionale të cilat ofrohen për klientët.

Ndërsa, pronari i Ndërmarrjes “Hotel Garden”, z. Shpend Shala u shpreh i kënaqur për fillimin e partneritetit me UShAF dhe shprehu nevojën e domosdoshme që në të ardhmen të ketë sa më shume profesionistë në fushën e hotelerisë. Gjithashtu, ai potencoi se do të jenë të gatshëm që të iu ndihmojmë studentëve që përmes punës praktike të zhvillojnë aftësitë e tyre menaxheriale në fushën e hotelerisë. Po ashtu, ai shprehi gatishmërinë që të ua jep mundësinë studentëve që të bejnë punë sezonale në këtë Ndërmarrje.

Hotel Garden është hotel me 5 yje, i vendosur në periferi të qytetit të Prishtinës dhe i njohur për shërbime cilësore dhe staf profesional.