Trajnim i personelit akademik të UShAF për raste studimore të kompanive kosovare

Në kuadër të projektit “Krijimi i Qendrave nga Teoria në Praktikë për Inovacion dhe Punësueshmëri”, po bëhet trajnimi i personelit akademik të Universitetit të Shkencave të Aplikuara në Ferizaj (UShAF) për rastet studimore të kompanive.

Qëllimi i trajnimit është shfrytëzimi i rasteve të studimit të kompanive kosovare dhe inkorporimi i ideve në procesin mësimor tek studentët, formë e cila ndërlidhë mësimin praktik me atë teorik dhe bënë përgatitjen e studentëve për njohje më të mirë të bizneseve dhe operimit të tyre në Kosovë.

Gjatë trajnimit u elaboruan çështjet që kanë të bëjnë me: dallimin e planit të biznesit dhe rastit studimor, faktorët e rëndësishëm për rastin studimor, sfidat me të cilat ballafaqohen kompanitë, praktikat e pranueshme me të cilat mund të arrihet deri tek suksesi, historia e kompanisë dhe personat kyç në kompani, aplikimi dhe testimi i teorisë dhe motivimi i studentëve për krijimin e lidhjeve reciproke student-profesor për të krijuar mundësinë që edhe studentët të japin zgjidhje dhe të jenë sa më kreativ.

Po ashtu, u elaborua edhe mungesa e resurseve njerëzore, mungesa e stafit të kualifikuar dhe çështjet që duhet të zgjidh kompania e deri tek dhënia e ideve për tejkalimin e situatave të ndryshme.

Projekti “Krijimi i Qendrave nga Teoria në Praktikë për Inovacion dhe Punësueshmëri” është projekt i programit Erasmus+, i financuar nga Bashkimi Evropian, ku UShAF është partner në projekt.