Rektori Bajraktari priti përfaqësuesit e projektit “Heras”

Rektori i Universitetit të Shkencave të Aplikuara në Ferizaj, Prof. Dr. Agron Bajraktari priti sot përfaqësuesit e projektit “Heras”, z. Aqim Emurli, znj. Arbëresha Meha dhe znj. Donjeta Ibra.

Rektori Bajraktari i njoftoi për zhvillimet dhe të arriturat e UShAF, fakultetet dhe programet, të cilat funksionojnë në kuadër të Universitetit, numrin e madh të kerkesës për regjistrim në programet të cilat i posedon, numrin e madh të marrëveshjeve, përfitimin e dyanshëm të studentëve dhe bizneseve me të cilat ka marrëveshje.

Po ashtu, rektori Bajraktari foli për shkëmbimin e përvojave me universitetet ndërkombëtare, të cilat janë universitete prestigjioze dhe një mundësi e mirë për zhvillimin e UShAF si universitet i ri.

Rektori theksoi edhe faktin se tashmë është funksional Bordi Industrial i Universitetit me anëtarë që përfaqësojnë bizneset, të cilët kanë marrë pjesë edhe në rishikimin e planprogrameve të Hotelerisë dhe Turizmit.

Ndërsa, rektori Bajraktari foli edhe për sfidat gjatë punës dhe përpjekjet e mëdha për zhvillimin e Universitetit, i cili është specifik në Kosovë për programet që ka.

Zyrtarët e Projektit “Heras” u ndanë të kënaqur nga ky takim dhe vizita që i bënë Universitetit të Shkencave të Aplikuara në Ferizaj. Ata u shprehën se do ta ndihmojë Universitetin që të zhvillojë programe të reja.

Aqim Emurli tha se beson se së shpejti do të fillohet me konkretizimin e programeve, planeve, punëtorive, etj. Po ashtu, ai tha se do të ndihmojnë në avancimin e programeve të UShAF. “Ne si projekt vlerësojmë se a janë arritur rezultatet, t’ju ndihmojmë në ekspertizë, vizita studimore, etj.”, tha ai, ndërsa theksoi se projekti “Heras” do të zhvillohet në tri nivele: politikbërës, universitar dhe nivel individual, ose grupor.

Projekti “Heras” ka  për qëllim të kontribuojë në funksionimin e mirë të Arsimit të Lartë dhe Hulumtimeve në Kosovë në linjë me parimet e Zonës Evropiane të Arsimit të Lartë (EHEA) dhe zonës Evropiane të Hulumtimeve (ERA) me objektivë afatëgjatë për të përkrahur zhvillimin socio-ekonomik të vendit.

Projekti “Heras”, financohet nga Bashkëpunimi Austriak për Zhvillim me bashkëfinancim nga MAShT.

This post is also available in: English