Rektori Bajraktari dhe disa studentë të UShAF morën pjesë në Panairin Ndërkombëtar të Mobilerisë “Shqipëria 2017”

Zyrtarë të lartë të Universitetit të Shkencave të Aplikuara në Ferizaj (UShAF), së bashku me studentët e Faklutetit të Dizajnit të Mobileve dhe Teknologjisë së Drurit, si dhe të Hotelerisë dhe Turizmit, të prirë nga rektori, Prof. Dr. Agron Bajraktari morën pjesë në Panairin Ndërkombëtar të Mobilerisë “Shqipëria 2017”.

Gjatë kësaj vizite profesionale, studentët për së afërmi u njoftuan me të arriturat bashkëkohore në lëminë e teknologjisë  së përpunimit të drurit dhe dizajnit, si dhe makinerive në këtë industri. Studentët  patën rastin të njihen me mënyrën e menaxhimit dhe marketingut të kompanive të mëdha dhe të vogla, si dhe plasimin e produkteve në tregun e brendshëm dhe atë ndërkombëtarë.

Për funksionimin e industrisë së drurit në rajon , studentët u informuan nga inxhinieri Ramadan Topuzi, i cili në mënyrë kronologjike, bëri krahasimin e zhvillimit të lëmisë së përpunimit të drurit në Shqipëri dhe më gjerë.

Rektori Bajraktari vlerësoi se kjo vizitë është një mundësi e mirë që studentët të shohin nga afër mundësitë që ofron tregu dhe nga kjo, ndër të tjera, të nxjerrin edhe përfundime për shijen aktuale të konsumatorit.

Panairi “Shqipëria 2017”, është i 14-ti me radhë dhe është organizuar nga Albexpo Group në bashkëpunim me Shoqatën e Prodhuesve të Mobilerisë të Shqipërisë dhe Shoqatën e Përpunuesve të Drurit të Kosovës. Ky panair organizohet  çdo vit dhe ka për qëllim prezantimin e prodhimeve të drurit dhe dizajnit nga kompani vendore dhe të huaja.

This post is also available in: English