Memorandum Mirëkuptimi mes UShAF, Kompanive ‘’Genç’’ nga Turqia dhe ‘’Dekor Plus’’ nga Ferizaj

Pa Komente

Universiteti i Shkencave të Aplikuara në Ferizaj (UShAF) ka lidhur sot Memorandum Mirëkuptimi me Kompanitë ‘’Genç’’ nga Turqia dhe ‘’Dekor Plus’’ nga Ferizaj. Memorandumi u nënshkrua në ambientet e UShAF nga rektori i UShAF – Prof. Dr. Agron Bajraktari, drejtori i Kompanisë ‘’Genç’’ – z. Tamer Kara dhe drejtori  Kompanisë ‘’Dekor Plus’’ – z. Nexhmedin Loku.

Fillimisht rektori u takua me përfaqësuesit e kompanive të cilët i falënderoi për bashkëpunimin dhe mundësinë që po ua ofrojnë studentëve të UShAF që të njihen me teknologjinë e njërës prej kompanive më të avancuara në Botë.

Rektori Bajraktari tha se kjo është një mundësi e mirë që studentët të njihen me prodhimet e materialeve të prodhuara nga Kompania ‘’Genç’’.
‘’Jemi të privilegjuar që kemi një nga ekspertët, i cili do t’i njoftoj studentët me të arriturat dhe afarizmin e suksesshëm  të kësaj kompanie. Sigurisht që ky është vetëm fillimi i bashkëpunimit dhe shpresojmë që në të ardhmen i njejti do të thellohet me pritjen edhe të përfaqësuesëve të tjerë nga kjo kompani’’, tha Rektori.

Po ashtu, rektori foli edhe për rëndësinë e bojërave në Industrinë e Drurit dhe tha se vizitat e stafit dhe të studentëve të UShAF në këtë kompani do të ishin mundësi e mirë që për së afërmi të njihen me prodhimet e Kompanisë.

Drejtori i Kompanisë ‘’Genç’’, z. Kara, falënderoi rektorin për mundësinë e dhënë që të bëjë prezantimin për produktet e kësaj Kompanie, e cila ka një shtrirje në 60 shtete të Botës, por që synon që përmes ‘’Dekor Plus’’, si distributor për Kosovë të jenë trend edhe tek ne. Sipas tij marrëveshjet e tilla rrisin bashkëpunimin biznesor në mes Kosovës dhe Turqisë, sepse kjo ndikon në komunikimin në mes të të dyja shteteve.

Gjatë prezentimit, z. Kara foli për zhvillimin dhe funksionimin e kësaj Kompanie, e më pastaj foli për produktet e kompanisë: llojet e ngjyrave, vetitë, përparësitë dhe dobësitë e ngjyrave gjatë përdorimit të tyre.

Pjesëmarrës në nënshkrimin e këtij Memorandumi, si dhe në ligjëratë ishin edhe përfaqësues të kompanive vendore të përpunimit të drurit.

This post is also available in: English

Lini një Përgjigje

This site uses Akismet to reduce spam. Learn how your comment data is processed.