UShAF vazhdon me bashkëpunimin ndërkombëtar me dy universitete të Çekisë

Universiteti i Shkencave të Aplikuara në Ferizaj e vlerëson si pjesë e rëndësishme e zhvillimit të Universitetit bashkëpunimin ndërkombëtar. Prandaj, rektori i Universitetit të Shkencave të Aplikuara në Ferizaj, Prof. Dr. Agron Bajraktari, gjatë vizitës zyrtare në Çeki është pajtuar për bashkëpunim edhe me dy universitete të Çekisë: me Universitetin “Mendel”, në Brno dhe me Universitetin e Shkencave Jetësore, në Pragë.

Qëllimi i këtyre Marrëveshjeve është bashkëpunimi akademik i shkëmbimit të përvojave, mësimdhënësve, studentëve, litëraturës, bashkëpunimit shkencor, si dhe pjesëmarrja e përbashkët në projekte të ndryshme dhe fonde ndërkombëtare për arsim dhe shkencë.

Rektori Bajraktari u nda i kënaqur nga kjo vizitë dhe pritja që iu bë nga stafi menaxherial i këtyre dy universiteteve, e ne veçanti falënderoi prorektorët Michal Lostak – prorektor në Universitetin e Shkencave Jetësore, në Pragë dhe Martin Klimanek – prorektor për edukim në Universitetin “Mendel” të Brnos, ndërsa theksoi se për UShAF, si universitet i vetëm i shkencave të aplikuara në Kosovë, bashkëpunimi ndërkombëtar është i një rëndësie të veçantë.

Rektori u shpreh i bindur se nga ky bashkëpunim do të përfitojnë të gjitha këto institucione të arsimit të lartë, e sidomos UShAF si universiteti më i ri publik në vend, i cili po bën të pamundurën për përgatitjen e kuadrove të reja me shkathtësi dhe kompetenca jo vetëm për tregun vendor, por edhe për atë ndërkombëtar.

Të dyja universitetet, me të cilat do të bashkëpunojë Universiteti i Shkencave të Aplikuara në Ferizaj, janë universitete të fuqishme dhe të pajisura mirë nga ana e laboratoreve.

Udhëheqësit e të dy universiteteve janë shprehur të gatshëm që të vizitojnë UShAF-in dhe të shohin nga afër mundësitë e bashkëpunimit të ndërsjellë më qëllim të përfitimit të studentëve dhe stafit akademik, por edhe ekonomisë së vendeve të tyre.

This post is also available in: English