UShAF pjesëmarrës në edicionin e dytë të Konventës së Industrisë së Drurit

Me këtë rast, rektori Bajraktari ka mbajtur një prezantim, ku ka folur për bashkëpunimin me sektorin privat, rëndësinë e Bordit Industrial të Universitetit dhe zhvillimin e kurrikulës në bashkëpunim me sektorin privat.

Rektori Bajraktari tha se si Universiteti më i ri dhe i vetmi i shkencave të aplikuara në Kosovë për dallim me universitetet tjera publike ka një bashkëpunim të ngushtë me sektorin privat, i cili është pjesë e Universitetit përmes Bordit Industrial. Sipas tij suksesi i Universitetit është i përbashkët me këtë Bord. Po ashtu, rektori foli për programet, stafin, sigurimin e cilësis, etj.

Përfaqësuesit e bizneseve pjesëmarrëse në Konventë, z. Bujar Baliu nga Kompania “Anb Baliu” dhe z. Nexhmedin Sadiku nga kompania “Daqa”, në Ferizaj, u shprehën të kënaqur me punën e studentëve të UShAF që po prezantohen në ekspozitën që është pjesë e Konventës.

Ata theksuan se studentë të tillë të përgatitur mirë dhe kreativ, janë një shpresë e madhe për të ardhmen e tregut të përpunimit të drurit në Kosovë.

Edicioni i dytë i Konventës së Industrisë së Drurit është organizuar nga Shoqata e Përpunimit të Drurit të Kosovës (SHPDK), USAID-i në partneritet me SIDA-n, Projekti i financuar nga BE – ICEP, Ministria e Tregtisë dhe Industrisë (MTI) dhe Agjencia për Investime dhe Përkrahjen e Ndërmarrjeve në Kosovë (KIESA).

Ndër aktivitetet e shumta që do të mbahen gjatë dy ditëve sa zgjatë Konventa, edhe studentët do të kenë mundësi që të ekspozojnë dizajnet e tyre të mobilerisë si pjesë e Garës Studentore të Dizajnit, ku do të ndahen edhe çmime.

Studentët e UShAF të cilët po prezantojnë punimet e tyre në Konventë janë: Arlind Ramadani, Shkurte Xhemajli, Rinidon Bislimi, Andi Ejupi, Bardhyl Gashi, Agon Demiri, Rijad Shaljani, Miranda Hashani, Blerta Sylejmani, Besa Lika dhe Fjona Zejnullahu.