Create your own sidebar via Visual Composer with drag and drop tech, for almost all pages!
U themelua Bordi Industrial i Universitetit të Shkencave të Aplikuara në Ferizaj
Pa Komente
Universiteti i Shkencave të Aplikuara në Ferizaj (UShAF), ka mbajtur takim me përfaqësues të kompanive dhe bizneseve, me të cilat tashmë ka lidhur marrëveshje bashkëpunimi për punën praktike të studentëve.
Në këtë takim është themeluar Bordi Industrial i Universitetit, ndërsa vet përfaqësuesit e kompanive e kanë zgjedhur kryetarin e Bordit, z. Ibrahim Bucaliu – përfaqësues nga HIB Petrol.
Agron Bajraktari, u.d i rektorit, falënderoi përfaqësuesit e kopmanive, të cilët i janë përgjigjur pozitivisht ftesës për të qenë pjesë e këtij Bordi shumë të rëndësishëm për bërjen e politikave zhvillimore të Universitetit. Ai tha se kompanitë, me të cilat UShAF ka lidhur marrëveshje bashkëpunimi për aftësimin e studentëve, do të jenë të kyçura direkt në proceset zhvillimore përmes këtij Bordi, i cili është i përhershëm.
“Në këtë mënyrë, ju do të jeni gjithmonë pjesë e suksesit të Universitetit të vetëm të këtij lloji në Kosovë dhe po ashtu së bashku do të ndihmojmë zhvillimin e vendit, duke përgatitur kuadro të përgatitura mirë në profesione të caktuara”, tha ai, ndërsa theksoi se themelimi i një bordi të tillë, është praktikë që është treguar shumë e suksesshme në universitetet e zhvilluara të shkencave të aplikuara në Evropë.
Ne jemi shumë të kënaqur, tha z. Bajraktari, që nuk keni hezituar të bëheni partnerë të UShAF dhe mund të themi se bashkëpunimi me juve ka qenë i një rëndësie të veçantë në fillimin e mbarë të punës së Universitetit më të ri publik në Kosovë.
Përfaqësuesit e kompanive dhe bizneseve theksuan se janë të kënaqur me çasjen që ka treguar UShAF ndaj tyre dhe thanë se janë të gatshëm të japin kontribut të vazhdueshëm në zhvillimin e Universitetit.
Universiteti i Shkencave të Aplikuara në Ferizaj tashmë ka lidhur 23 marrëveshje bashkëpunimi me biznese dhe institucione të ndryshme të vendit dhe ndërkombëtare, të cilat krijojnë mundësi të vazhdueshme të përgatitjes profesionale të studentëve.