Studentja e UShAF Lorita Rama po qëndron në Rijekë të Kroacisë

Studentja e Universitetit të Shkencave të Aplikuara në Ferizaj, Lorita Rama, e cila është edhe anëtare e  Unionit të Studentëve të Kosovës, bashkë me një delegacion nga ky Union, po qëndron në Rijekë të Kroacisë. 

Kjo vizitë po realizohet si pjesë e bashkëpunimit mes Unionit të Studentëve të Kosovës dhe Unionit të Studentëve të Kroacisë, ndërsa vizita ka për qëllim diskutimin e mundësive për projekte të përbashkëta në funksion të thellimit të bashkëpunimit për avancimin e pozitës së studentëve.

Ndër të tjera, gjatë takimeve është biseduar për mbështetjen që mund të japin përfaqësuesit e studentëve kroat për organizimin e Konventës Evropiane Studentore, e cila së shpejti do të organizohet nga Unioni i Studentëve të Kosovës dhe është një organizim i pari i këtij lloji.