Rektori Bajraktari mori pjesë në tryezën me temë ‘’Institucionet e Arsimit të Lartë konform kërkesave të tregut rajonal dhe atij ndërkombëtar të punës’’

Rektori i Universitetit të Shkencave të Aplikuara në Ferizaj (UShAF), Prof. Dr. Agron Bajraktari, mori pjesë në tryezën e rrumbullakët me temë ‘’ ’Institucionet e Arsimit të Lartë konform kërkesave të tregut rajonal dhe atij ndërkombëtar të punës’’, e cila u mbajt në Universitetin e Mitrovicës ‘’Isa Boletini’’.

Në këtë tryezë, ku ishin të pranishëm rektorët e Universiteteve Publike të Kosovës, zyrtar qeveritarë, biznesmen, etj., u bisedua për prioritetet që duhet të iu jepen universiteteve lidhur me aktualitetin zhvillimor të industrisë në Kosovë, fushën e inovacionit për qëllim të rritjes ekonomike dhe bashkëpunimin Universitet – Industri për mundësi të punës praktike për studentë. Po ashtu, u shtrua nevoja për modele të reja të bashkëpunimit ndërmjet universiteteve dhe industrisë me programe studimi ku do të përgatiten kuadro të nevojshme për tregun e punës.
Rektori Bajraktari, e cilësoi si të qëlluar këtë iniciativë dhe të pranishmit i njoftoj se një bashkëpunim i tillë ka kohë që implementohet me mjaft sukses në mes të UShAF dhe industrisë.
‘’Jemi Universitet unik për shkenca të aplikuara, me një përvojë të re dy vjeçare. Më parë ishte vështirë të siguronim studentë për drejtimet përkatëse, ndërsa tani me programe të reja atraktive dhe në bashkëpunim me më tepër se 60 biznese, të cilat përbëjnë Bordin Industrial të Universitetit, kemi arritur që të shumfishojmë numrin e të interesuarëve për të studiuar në UShAF. Në saje të bashkëpunimit me biznese, kemi arritur ndryshimin e kurrikulave për më tepër se 70 %. Përfitimi i bashkëpunimit është rezultat i përbashkët, sepse ne japim kuadër cilësor, ndërsa bizneset pranojnë ekspert, të cilët janë shumë të kërkuar në vendin tonë dhe në një të ardhme të afërt nuk do të varemi nga ekspertët e jashtëm. Për këtë arsye, në Ferizaj dhe më gjerë, biznesi ka hapur dyert e bashkëpunimit qysh moti’’, tha Rektori.