Rektori Bajraktari diskutoi me studentët për punën dhe të ardhmen e Universitetit

Rektori i Universitetit të Shkencave të Aplikuara në Ferizaj (UShAF), Prof. Dr. Agron Bajraktari mbajti Tryezë me studentët, ku u diskutua për të arriturat, sfidat dhe të ardhmen që i pret studentët me përfundimin e studimeve në UShAF.

Gjatë këtij takimi studentët u njoftuan nga Rektori për përfitimet që kanë studentët nga programet të cilat i posedon Universiteti, programet e reja të cilat së shpejti do të hapen, stafin akademik, hapësirën moderne, laboratoret ekzistuese dhe ato që do të kompletohen dhe aktivizohen këtë vit, përfitimet nga programi Erasmus+ dhe punën e studentëve me të cilën sipas tij Universiteti po duket ndryshe dhe mjaftë mirë i krahasueshëm me universitetet e mëdha evropiane.

“Ndjej knaqësi kur mbledhemi me ju studentë të dashur dhe diskutojmë rreth Universitetit tonë, sepse ju së bashku me ne jemi bashkëpronar të Universitetit. Përkushtimi juaj gjatë kryerjes së punës praktike nëpër kompani dhe institucione vendore dhe ndërkombëtare, si dhe organizimi i ekspozitave e punëtorive, ka bërë që universiteti jonë të duket ndryshe. Së shpejti, përveç plotësimit dhe aktivizimit të laboratorëve, Universiteti ynë do të ketë të funksionalizuar edhe bibliotekën digjitale. Çdo veprim i ndërmarrë në institucionin tonë është në pajtueshmëri të plotë me legjislacionin në fuqi. Jemi të prirur dhe të vëndosur që kërkesat e çdo studenti t’i shqyrtojmë me vemendje të plotë dhe t’iu dalim në ndihmë në realizimin e tyre, dhe siç kemi qenë deri më tani, do të jemi transparent dhe të hapur çdoherë”, tha Rektori.

Nga ky takim studentët u ndanë të kënaqur dhe falënderuan Rektorin për mundësitë e shumta që po ua krijon atyre dhe se asnjëhërë nuk është kursyer për t’iu dalur në ndihmë kërkesave të tyre lidhur me mësimin dhe jetën studentore.