UShAF hynë në Marrëveshje Bashkëpunimi me Kompaninë turistike “FIBULA”, në Prishtinë

Studentët e Fakultetit të Turizmit dhe Ambientit, përfituan edhe një mundësi të mirë për punë praktike, me rastin e nënshkrimit të Marrëveshjes së Bashkëpunimit mes UShAF dhe Kompanisë turistike “FIBULA”, në Prishtinë.

Rektori i UShAF, Prof. Dr. Agron Bajraktari shprehi falënderim ndaj Kompanisë “FIBULA”, për gatishmërinë lidhur me nënshkrimin e Marrëveshjes për partneritet, në mënyrë që studentët krahas mësimit teorik, të përfitojnë dhe aftësohen në mësimin praktik që do të bëhet në këtë Kompani. Po ashtu, Rektori theksoi se dita ditës kërkesat për profesionistë në lëminë e turizmit po rriten dhe po ndjehet nevojë për kuadro të specializuara, të cilët do të bëjnë menaxhimin e kësaj lëmie të rëndësishme. Ky bashkëpunim sipas tij do të jetë frytdhënës, ku studentët do të pajisen me ide inovative dhe do të njoftohen me trendet bashkëkohore të turizmit në vend dhe jashtë tij.

Pronari i Kompanisë turistike “FIBULA” z. Shpëtim Turku u shpreh i kënaqur për këtë iniciativë bashkëpunuese dhe tha që ky bashkëpunim do të jetë në të mirë të përbashkët për studentët dhe Kompaninë. Gjithashtu, ai theksoi nevojën e kahershme për një bashkëpunim të tillë me Institucionet e Arsimit të Lartë, për një zhvillim më të mirë ekonomik dhe shoqëror të vendit.

Qëllimi i kësaj Marrëveshje është ofrimi i mundësive për studentë, për krijim të karrierës dhe përfitimi i profesionistëve për lëminë përkatëse.