Prorektorja e Universitetit të Ekologjisë dhe Menaxhmentit në Varshavë vizitoi UShAF-in

Në Universitetin e Shkencave të Aplikuara në Ferizaj (UShAF), ka qëndruar prorektorja e Universitetit të Ekologjisë dhe Menaxhmentit në Varshavë,  Justyna Klys, e cila këtë vizitë e ka realizuar duke shfrytëzuar mundësinë e mobilitetit nga programi “Erasmus+”.

Prorektorja Klys është pritur nga rektori i UShAF, Prof. Dr. Agron Bajraktari, i cili e ka njoftuar atë për mundësitë që ofron ky universitet, programet, studentët, për të arriturat dhe sfidat me të cilat ballafaqohet. Po ashtu, në këtë takim është biseduar për bashkëpunimin e deritanishëm mes UShAF dhe Universitetit të Ekologjisë dhe Menaxhmentit në Varshavë, me të cilin UShAF ka Marrëveshje Bashkëpunimi.

Rektori Bajraktari e ka falënderuar prorektoren Klys për bashkëpunimin dhe ka theksuar nevojën për thellimin e këtij bashkëpunimi në shumë segmente, sidomos në mobilitetin e studentëve dhe stafit akademik e administrativ.

Prorektorja Klys, duke theksuar rëndësinë e mobilitetit të studentëve, ndër të tjera ka përmendur edhe dy studentet e UShAF, të cilat po qëndrojnë në universitetin ku ajo është pjesë menaxheriale. Ajo theksoi se këto studente po arrijnë rezultate të shkëlqyeshme dhe studente të tilla janë edhe pasqyrë e universitetit dhe vendit prej nga vijnë.

Prorektorja Klys është takuar edhe me stafin akademik e administrativ dhe me studentët për të parë nga afër punën akademike që bëhet në UShAF dhe kushtet në të cilat zhvillohet jeta akademike në këtë Universitet. Ajo ka vlerësuar lartë punimet e studentëve që i kanë bërë në objektin e Universitetit, ndërsa ka mbetur e befasuar për faktin se gjithë këto punë kryhen nga një staf i vogël në numër, por që funksionon jashtëzakonisht mirë si ekip.

Prorektorja Klys ka falënderuar stafin menaxherial, akademik e administrativ, si dhe studentët e UShAF për pritjen që i kanë bërë dhe për mundësinë e dhënë për ta njohur këtë institucion të arsimit të lartë në Kosovë.