Trajnim për stafin e USHAF për Teknologjinë e Informacionit dhe Komunikimit Elektronik në Arsim

Pas përmbylljes së suksesshme të Konferencës “Aplikimi i Teknologjisë së Informacionit në Arsim – Përvojat e Kosovës”, Universiteti i Shkencave të Aplikuara në Ferizaj vendosi që të organizojë trajnimin, i cili do të mbahet në dy faza për profesorët dhe stafin administrativ me ç’rast faza e parë e trajnmit përfundoi me sukses.

Rektori i UShAF, Prof. Dr. Agron Bajraktari priti në takim zyrtarë të këtij projekti (z. Argjend Osmani – këshilltar i projektit, znj. Besa Zajasi – eksperte në projekt dhe z. Adnan Osmani – ekspert i TI-së), ku u bisedua për rëndësinë e këtij projekti, si dhe përfitimet dhe lehtësimin e metodave të ndryshme të teknologjisë, të cilat dita-ditës po e bëjnë më të lehtë procesin e të mësuarit në çdo kohë.

Rektori Bajraktari u shpreh falënderues ndaj zyrtarëve të Projektit, të cilët po gjejnë kohë që këto informacione të rëndësishme t’i ndajnë me stafin e Universitetit.

Argjend Osmani falënderoi rektorin Bajraktari për pritjen dhe mundësinë që po ua krijon që të kontribojnë në zhvillimin e teknologjisë informative në UShAF.

Në fazën e parë të këtij trajnimi, z. Osmani foli për rëndësinë e aplikimit të TIK-ut në arsim, inovacionin në arsim, ngritjen e motivimit, rritjen e efektivitetit të mësimdhënies dhe mësimnxënies, të mësuarit përmes lojës, aplikimin e TIK-ut në arsim dhe jo vetëm për argëtim, interaktivitetin, etj.  Po ashtu, ai foli edhe për ngritjen e shkathtësive përmes kurseve online (cousera.com, alison.com, MOOC, etj.)

Veç tjerash u diskutua për përparësitë, mangësitë dhe pengesat e mundshme për implementimin e TIK-ut në Universitet dhe si të tejkalohen këto pengesa. Gjatë trajnimit, u diskutua edhe për shkollat në të kaluarën dhe si janë sot, fabrikat dhe prodhimtarinë në fillim të shek. 20 dhe fabrikat moderne të shek. 21, etj.

Teknologjia e Informacionit dhe Komunikimit (TIK) dhe Mësimi Elektronik në Arsim, është projekt i Bashkimit Evropian.