Marrëveshje Bashkëpunimi me Business Support Centre Kosovo dhe Shoqatën e Përpunuesve të Drurit në Ferizaj

Z. Bajraktari ka falënderuar partnerët më të ri të Universitetit për mundësinë që po iu japin studentëve dhe ka theksuar edhe faktin se, sipas marrëveshjes, edhe biznesi, respektivisht Shoqata, do të përfitojë nga puna dhe njohuritë e studentëve, por edhe nga përvoja e mësimdhënësve për zgjidhjen e problemeve praktike dhe shkencore.

“Kosova ka një rini shumë inteligjente dhe ne po krijojmë mundësi që së bashku t’ua japim rastin të rinjve tanë që të bëhen të zotët në profesionin e tyre, por unë besoj se edhe kompanitë do të përitojnë nga kreativiteti i studentëve”, tha z. Bajraktari, ndërsa theksoi se UShAF po përparon në këtë drejtim me shpejtësi të jashtëzakonshme.

“Marrëveshjet e shumta që janë nënshkruar dhe do të vazhdojnë të lidhen edhe më tutje me bizneset, janë në funksion të ngritjes së cilësisë, pra të zhvillimit të Universitetit dhe kjo do të bëj që Universiteti i Shkencave të Aplikuara në Ferizaj të jetë universitet i kërkuar nga të rinjtë e Kosovës dhe më gjerë dhe ne të gjithë do të ndihemi krenarë që jemi pjesë e hapave të parë të punës së këtij institucioni”, tha ai.

Edhe përfaqësuesi i Business Support Centre Kosovo, z. Besnik Krasniqi dhe përfaqësuesi i Shoqatës së Përpunuesve të Drurit në Ferizaj, z. Arianit Kastrati u shprehën të kënaqur që do të kenë mundësinë të bartin përvojat e tyre te gjeneratat më të reja, që është edhe kontribut për të ardhmen e biznesit në Kosovë.