Vizitë e Studentëve të UShAF në Muzeun e qytetit të Ferizajt

Studentët e vitit të III-të të Fakultetit të Turizmit dhe Ambientit, në kuadër të lëndës “Arti, Historia dhe Trashëgimia Kulturore”, vizituan Muzeun e qytetit të Ferizajt, i cili është themeluar në vitin 2011 dhe është njëri ndër Muzetë më të ri në Kosovë.

Gjatë kësaj vizite, përfaqësuesi i Muzeut, z. Ilir Bytyçi i njoftoi studentët me artefaktet që gjinden në këtë Muze, i cili posedon eksponate nga fusha e arkeologjisë, historisë dhe etnologjisë. Po ashtu, ai u shpjegoi për eksponatin më të vjetër të quajtur “Figurina”, i cili i përket periudhës së Neolitit, si dhe eksponate nga koha e bronzit, hekurit, periudhën pas lindjes së Krishtit e deri tek historia e pas luftës në Kosovë.

Qëllimi i kësaj vizite ishte njohja për së afërmi me historinë dhe trashëgiminë kulturore që ka ky rajon.

Studentët të shoqëruar nga profesorët: Prof. Rrahim Sejdiu, Prof. Flamur Salihu dhe Prof. Lejla Ibrahimi, gjatë kësaj vizituan edhe Galerinë e Arteve të qytetit të Ferizajt.