UShAF lidhë Marrëveshje Bashkëpunimi me Ndërmarrjen “ANB Baliu” për punën praktike të studentëve

Universiteti i Shkencave të Aplikuara në Ferizaj dhe Ndërmarrja për prodhimin e mobilieve “ANB Baliu”, në Ferizaj, nënshkruan sot Marrëveshje Bashkëpunimi për realizimin e punës praktike të studentëve.

Ndërmarrja ANB Baliu, e cila merret me prodhimin e mobilieve, si: kuzhina, dhoma gjumi për të rritur dhe fëmijë, komodina për TV, etj., do t’iu mundësoj studentëve të kryejnë punën praktike dhe të zhvillojnë temat e diplomës në këtë Ndërmarrje.

Rektori i UShAF, Prof. Dr. Agron Bajraktari falënderoi z. Baliu që pranoi të jetë pjesë e Universitetit tonë dhe për mudësinë që po ua jep studentëve të UShAF për t’u profesionalizuar në këtë fushë.

Rektori Bajraktari u shpreh i bindur se edhe Ndërmarrja do të përfitoj nga njohuritë e studentëve dhe puna e tyre, sepse tha se Universiteti ka studentë shumë të mirë, të cilëve duhet t’u jepet rasti për të shprehur aftësitë kreative.

Edhe drejtori i Ndërmarrjes “ANB Baliu”, z. Bujar Baliu, u shpreh i kënaqur nga nënshkrimi i kësaj Marrëveshje, sepse sipas tij, në vendin tonë nuk kemi kuadro të mjaftueshme profesionale dhe shpreson se UShAF do të nxjerr njerëz të tillë në mënyrë që të përfitojnë edhe ndërmarrjet. Po ashtu, ai u shpreh i gatshëm që të punësoj studentët e UShAF, të cilët do të tregohen të suksesshëm gjatë punës praktike.

This post is also available in: English