USHAF jep donacione për Shkollën e Mesme të Agrobiznesit dhe Teknologjisë “Zenel Hajdini” në Ferizaj

Universiteti i Shkencave të Aplikuara në Ferizaj (USHAF) ka vendosur që të japë si donacion paisje teknologjike për Shkollën e Mesme të Agrobiznesit dhe Teknologjisë “Zenel Hajdini” në Ferizaj.

Ky vendim është bërë i ditur gjatë një vizite që i kanë bërë Universitetit udhëheqës dhe profesorë të kësaj shkolle, të prirë nga drejtori Avdullah Imeri, të cilët janë pritur nga rektori, Prof. Dr. Agron Bajraktari.

Rektori Bajraktari u shpreh i kënaqur që Universiteti ka arritur të ndihmojë këtë shkollë me disa paisje teknologjike dhe paisje të tjera, të cilat për shkak të zhvillimit të teknologjisë, nuk përkojnë më me programet e studimit dhe nuk janë të krahasueshme me këtë nivel të studimeve, por që për shkollën e mesme janë të mirëseardhura.

Rektori përmendi edhe faktin se të gjithë ata që kanë vendosur që këto paisje t’i jepen shkollës (stafi i brendshëm dhe Këshilli Drejtues), e dinë rëndësinë e donacioneve, sepse edhe Universiteti po ndihmohet nga donatorë të ndryshëm.

“Ndihem shumë mirë që ne si Universitet kemi mundësi të japim këtë donacion për shkollën dhe shpresojmë se këto paisje do të mundësojnë që shkolla të realizojë planprogramet e tyre në mënyrën më të mirë, në mënyrë që të përfitojnë nxënësit njohuri”, tha rektori Bajraktari.

Rektori i USHAF theksoi se niveli i 5-të i studimeve është pjesë e kurrikulave, pjesë e studimeve mes shkollës së mesme dhe Universitetit (bachelor-it), andaj shprehu bindjen e tij se duke pasur parasysh këtë, të dy këto institucione arsimore duhet të jenë shumë më afër.

Rektori Bajraktari tha se bashkëpunimi me këtë shkollë, por edhe me shkolla të tjera të kësaj natyre në Kosovë, do të mund të shtrihet në shumë segmente, duke filluar nga përgatitja e kurrikulave dhe përshtatja e tyre me programet e studimit dhe anasjelltas, e deri te sensibilizimi i nxënësve për mundësitë e studimeve që ofron USHAF, si i vetmi universitet i profilizuar në vend.

Ndërsa, drejtori i shkollës “Zenel Hajdini”, z. Avdullah Imeri u shpreh mirënjohës për këtë donacion, për të cilin tha se shkolla ka pasur nevojë të theksuar dhe është i mjaftueshëm për të kompletuar një kabinet, që iu përshtatet nevojave të programeve të caktuara.

Drejtori po ashtu theksoi se ky kabinet do të lehtësojë mësimnxënien dhe mësimdhënien dhe nxënësit e interesuar për studime në USHAF do ta kenë më të lehtë vazhdimin e studimeve në këtë universitet.