Create your own sidebar via Visual Composer with drag and drop tech, for almost all pages!
UShAF dhe OEK nënshkruajnë Marrëveshje Bashkëpunimi për aftësimin profesional të studentëve
Pa Komente
Universiteti i Shkencave të Aplikuara në Ferizaj (UShAF), ka lidhur sot Marrëveshje Bashkëpunimi me Odën Ekonomike të Kosovës (OEK), ngjarje kjo që është vlerësuar si e rëndësisë së veçantë nga udhëheqësit e këtyre dy institucioneve, e po ashtu edhe nga ministri i Arsimit, Shkencës dhe Teknologjisë, z. Arsim Bajrami, i cili ishte i pranishëm në këtë ceremoni.
Marrëveshja, e cila u nënshkrua nga ushtruesi i detyrës së rektorit të UShAF, z. Agron Bajraktari, dhe kreu i OEK-ut, z. Safet Gërxhaliu, iu mundëson studentëve të universitetit më të ri publik në vend, të kryejnë praktikën profesionale në projektet e OEK-ut.
Ministri Bajrami, me këtë rast, theksoi se tashmë është kuptuar nevoja për një reformë të arsimit të lartë, një arsimim cilësor, një arsimin që lidhet me nevojat ekonomike me nevojat e tregut të punës.
“Jemi duke zhvilluar projekte strategjike në tërë sektorin e edukimit që të ndërtojmë një sistem cilësor të arsimimit një arsimim për punësim; një arsimim që do të ndërtojë të rinj me shkathtësi dhe me kompetenca, të cilët do të plasohen në tregun e punës dhe do të kontribuojnë në tranzicionin ekonomik”, u shpreh ministri i Arsimit.
Kurse, Agron Bajraktari, u.d. i rektorit, tha se me marrëveshjen e nënshkruar sot, UShAF po vazhdon lidhjen me bizneset, gjë që është shumë e rëndësishme për përgatitjen e kuadrove të reja për tregun e punës. “Të gjitha programet, sot kanë partnerë në fusha të ndryshme, jo vetëm në Ferizaj, por edhe me gjerë”, theksoi z. Bajraktari, ndërsa tha se synimi është shtimi i praktikës profesionale deri 50 për qind gjatë kohës së studimeve.
Duke folur për punën që do të bëjnë studentët nëpër bizneset partnere, z. Bajraktari theksoi se do t’i kushtohet rëndësi performancës së studentëve nëpër biznese. “Gjatë avancimit të njohurive të studentëve, rëndësi të veçantë do t’i kushtohet edhe performancës që studentët do të kenë nëpër kompani. Sigurisht që kjo performacë dhe ky angazhim i tyre do të sjellë më afër punësimin e tyre”, tha ai, ndërsa theksoi se UShAF po bën atë që e bëjnë shumica e universiteteve të aplikuara në Evropë, duke e rritur numrin e të punësuarve të sapodiplomuar.
Ndërsa, kreu i OEK-ut, z. Safet Gërxhaliu tha se ky memorandum do të ketë efekte të shumta, përfshirë përgatitjen e kuadrove sipas nevojave të tregut të punës dhe tregon seriozitetin që kemi ndaj Universitetit. “Sa më të fuqishëm ta kemi nivelin e arsimit dhe edukimit, garancia për zhvillim ekonomik është më e madhe”, theksoi ai.
Marrëveshja e nënshkruar me Odën Ekonomike të Kosovës, shënon numrin rendor 23 të marrëveshjeve që ka lidhur Universiteti i Shkencave të Aplikuara në Ferizaj me kompani dhe biznese të ndryshme, edhe pse ka vetëm pak kohë që është themeluar si institucion i arsimit të lartë.