PhD. Cand. Lebibe Topalli-Shabani, aktualisht, është dekane e Fakultetit të Arteve të Aplikuara, në Universitetin e Shkencave të Aplikuara në Ferizaj.

Karriera e saj akademike, filloi në vitin 2022, në Universitetin e Shkencave të Aplikuara në Ferizaj, si pjesë e stafit të Fakultetit të Arteve të Aplikuara.

Në vitin 2006 angazhohet në profesionin e mësimdhënëses së nivelit fillor e të mesëm në Ferizaj. Me iniciativë të saj, në shtator të vitit 2016, për herë të parë hapet drejtimi i artit figurativ në shkollën e mesme të arteve “Çesk Zadeja” në Ferizaj, prej ku Topalli – Shabani transferohet si profesoreshë e pikturës deri në vitin 2022.

Eksperienca profesionale artistike e Topalli – Shabani përfshinë edhe rolin e saj si kuratore artistike në organizimin e Festivalit ndërkombëtar të muraleve “MuralFest Kosova”. Ajo ishte jo vetëm themeluese e këtij festivali, po edhe drejtuese e tij që nga viti 2016 deri në vitin 2024.

Pos kësaj, Topalli – Shabani, nga viti 2020, është anëtare e Bordit Drejtues të Galerisë së Arteve në Ferizaj.

Bashkëpunimi i saj ishte edhe me Shoqatën e Artit Figurativ “Zef Kolombi” në Ferizaj, ku midis viteve 2011 e 2014 shërbeu si nënkryetare, ndërsa si kryetare nga viti 2014 deri në vitin 2016.  Në po të njëjtin vit nga Komuna e Ferizajt, Topalli-Shabani, shpallet “Artisti i Vitit”.

Studimet bachelor i përfundoi në vitin 2005, Universitetin e Tetovës, ndërsa ato master në vitin 2008, në Universitetin e Prishtinës. Aktualisht është duke vazhduar me studime të doktoratës, në drejtimin e Historisë së Artit dhe Arkeologjisë në Fakultetin Filozofik të Universitetit “Cyril i Methodius” në Shkup, Maqedoni e Veriut.

Topalli-Shabani tashmë njihet si artiste e çmuar brenda dhe jashtë vendit. Ka realizuar gjithsej nëntë (9) ekspozita personale dhe mbi pesëdhjetë (50) ekspozita kolektive, duke u prezantuar artistikisht në shumë galeri në vende të ndryshme si në Kosovë, Maqedoni, Shqipëri, Turqi, Zvicër e Francë. Gjithashtu, ajo mori pjesë në shumë konferenca  të nivelit vendor dhe ndërkombëtar, duke prezantuar artin dhe punën e saj përpara një publiku  të larmishëm.

Përmes mediumeve vendore, po edhe atyre ndërkombëtare, si: L’Espace, Telegraph.UK, Jutarnji.hr, ajo u bë e shquar në botën e artit.

PhD. Cand. Lebibe Topalli-Shabani synim kryesor ka zhvillimin e kulturës së artit në vend.