Prorektori Bujar Pira mori pjesë në Konferencën “Arsim për të ardhmen”

Prorektori për Bashkëpunim Ndërkombëtar dhe Sigurim të Cilësisë në UShAF, Prof. Dr. Bujar Pira mori pjesë në Konferencën dy ditore “Arsim për të ardhmen, Fuqizimi i bashkëpunimit në mes të institucioneve të Arsimit të Lartë të Kosovës, Qeverisë dhe Sektorit Privat”, të organizuar nga KUSA (Kosovo United States Alumni) dhe Ambasada Amerikane në Prishtinë.

Qëllimi i Konferencës ishte trajtimi i mungesës së bashkëpunimit në mes të institucioneve të arsimit të lartë në Kosovë dhe tregut të punës, me fokus të veçant zbutjen e dallimit në mes të njohurive, aftësive dhe kompetencave që institucionet e arsimit të lartë u ofrojnë studentëve dhe kërkesave të tregut të punës.

Në këtë Konferencë u trajtuan tema të ndryshme në disa sesione, ku njërën prej tyre e ka qenë folësi kryesor prorektori Pira me temën “Mësimdhënia me studentin në qendër, Mësimnxënia dhe Vlerësimi”. Në kuadër të temës ndër të tjera prorektori foli edhe për çasjen e menaxhmentit të UShAF ndaj studentëve, si dhe stimulimin që ua japin atyre duke i përfshirë në procese të rëndësishme. Sipas tij transferi i dijes duhet të evoluoj në praktika të reja të mësimdhënies ku në fokus është studenti, duke ndikuar në zhvillimin e shkathtësive dhe njëkohësisht ruajtjen e kreativitetit të tyre në të menduar.