Presidenti Thaçi e uroi rektorin Bajraktari për sukseset në ndërlidhjen e arsimit me tregun e punës

Pa Komente

Rektori i Universitetit të Shkencave të Aplikuara në Ferizaj, z. Agron Bajraktari me bashkëpunëtorë, është pritur sot në takim nga Presidenti i Kosovës, z. Hashim Thaçi, të cilin e ka informuar për mbarëvajtjen e punës në Universitetin më të ri publik në vend.

Presidenti Thaçi, ndër të tjera, ka theksuar se Universiteti i Ferizajt brenda një kohe të shkurtër është shndërruar në një institucion të arsimit të lartë profesional, jo vetëm për Ferizajn, por edhe për rajonin, ndërsa ka përgëzuar rektorin, stafin dhe studentët për punën dhe përkushtimin në ndërtimin dhe zhvillimin e Universitetit, i cili ofron programe të veçanta në Kosovë dhe rajon.

Po ashtu, Presidenti Thaçi ka përmendur ndërlidhjen e arsimit të lartë me tregun e punës, ndërsa ka theksuar se USHAF është një mundësi e mirë në këtë drejtim, sepse ofron programe të veçanta.

Rektori Bajraktari, pasi që ka falënderuar Presidentin Thaçi për mbështetjen që i ka dhënë Universitetit, ka theksuar se krahas punës akademike, është duke u punuar edhe në krijimin dhe zgjerimin e infrastrukturës, me prioritet ndërtimin e dy laboratorëve dhe ndërtimin e konvikteve dhe mensës së studentëve.

Duke folur për të arriturat, rektori Bajraktari përmendi marrëveshjet e shumta të nënshkruara me bizneset për punën praktike të studentëve, por edhe marrëveshjet me institucione vendore dhe ndërkombëtare, të cilat hapin rrugë për zhvillimin e Universitetit dhe ecjen përkrah universiteteve të zhvilluara.

Rektori Bajraktari, po ashtu theksoi se përveq që janë shtuar kërkesat e të rinjve kosovar për studime në UShAF, profilet që ka ky universitet, e që japin mundësi të kyqjes më të shpejtë në tregun e punës, kanë bërë që të ketë interesim edhe nga të rinjtë që jetojnë në vendet fqinje.

Në këtë takim ishin prezentë edhe sekretari i përgjithshëm dhe prorektorët e Universitetit të Shkencave të Aplikuara në Ferizaj.

Lini një Përgjigje

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.