Përfaqësues të UShAF morën pjesë në Konferencën “Inovacioni për një të Ardhme të Qëndrueshme”

Në kuadër të Projektit “Creating Theory to Practice Centers for Innovation and Employment”, Rektori i Universitetit të Shkencave të Aplikuara në Ferizaj (UShAF), Prof. Dr. Agron Bajraktari dhe Prorektori për Marrëdhënie Ndërkombëtare, Prof. Dr. Bujar Pira, së bashku me disa studentë të UShAF, morën pjesë në Konferencën e Inovacionit me titull “Inovacioni për një të Ardhme të Qëndrueshme”.

Gjatë kësaj Konference u trajtuan tema të ndryshme në disa sesione, ku studentët nga UShAF ishin shumë aktiv me pjesëmarrje si në diskutime e po ashtu edhe në prezantimet e tyre.

Rektori Bajraktari ishte panelist në njërin nga Sesionet e kësaj Konference me temën “Misioni në ndryshim dhe zgjerim i Institucioneve të Arsimit të Lartë: Kërkimi i qasjeve të reja për t’u afruar me nevojat e tregut të punës dhe trajtimin e mospërputhjeve ekzistuese të cilësisë dhe aftësive”. Ai foli për eksperiencat e UShAF, bashkëpunimin me industrinë, bashkëpunimin me Universitetin e Shkencave të Aplikuara në Salzburg, i cili sipas tij kanë ndikuar shumë që UShAF t’iu përshtatet më shumë kërkesave të industrisë.

Ndërsa, Prorektori Pira ishte udhëheqës në Sesionin për nxitjen e punësimit të studentëve, ku u trajtua tema ”Shkathtësitë që ju nevojiten për karrierën tuaj”.

Konferferenca u mbajt në Prishtinë, në Bibliotekën Qendrore Universitare, e organizuar nga Universiteti i Prishtinës dhe Kolegji Ndërkombëtar i Biznesit në Mitrovicë. Të pranishëm në Konferencë ishin përfaqësues të Universiteteve Publike dhe Private të Kosovës, përfaqësues nga Universitetet Ndërkombëtare, Ambasadori i Ambasadës së Finlandës në Kosovë, etj.