Në UShAF u nënshkrua Memorandumi për hapjen e Qendrës së Inovacionit dhe Ndërmarrësisë

Në Universitetin e Shkencave të Aplikuara në Ferizaj (UShAF), zyrtarisht është bërë nënshkrimi i memorandumit për hapjen e Qendrës së Inovacionit dhe Ndërmarësisë. Memorandumi u nënshkrua nga Kryetari i Komunës së Ferizajt, Agim Aliu si dhe Ministri i Inovacionit dhe Ndërmarrësisë Besim Beqaj.

Gjatë kësaj Cermonie u tha se Ferizaj për herë të parë bëhet me Qendër të Inovacionit dhe Ndërmarrësisë, hap ky i rëndësishëm në përgatitjen e kuadrove për nevojat e tregut.

Afrim Loku, prorektor në UShAF, i përshëndeti të pranishmit dhe tha se krijimi i kësaj Qendre lidhet ngusht me misionin dhe vizionin për të cilin është përcaktuar universiteti ynë, po ashtu ju bëri thirrje studentëve që të shprehin idetë dhe kreativitetin e tyre që deri më tani nuk ju ka munguar asnjëherë.

Kryetari i Ferizajt, Agim Aliu ndër të tjera e cilësoi Ferizajn si kryeqytet ekonomik i Kosovës, si dhe foli për rëndësinë e hapjës së Qendrës së Inovacionit si projekt madhor për komunitetin e në veçanti për studentët e UShAF, meqë Ferizaj është qytet universitar në të cilin është synim realizimi i mësimit teorik në praktik dhe përgatitja e profesionistëve.

Ndërsa, Ministri i Inovacionit dhe Ndërmarrësisë, Besim Beqaj, tha se Ferizaj, sot po shënon një fillim të ri me hapjen e kësaj Qendre, e cila do të jetë ardhmëria e rinisë, që do të ndikoj në zhvillimin ekonomik, duke shfrytëzuar resurset për rritjen e produktivitetit.