Kompania austriake “Blum” së shpejti me prodhimet e veta, pjesë e laboratorit të Fakultetit të Arkitekturës, Dizajnit dhe Teknologjisë së Drurit, në UShAF

Rektori i Universitetit të Shkencave të Aplikuara në Ferizaj (UShAF), Prof. Dr. Agron Bajraktari priti sot në takim përfaqësuesin për Kosovë tëKompanisë austriake“Blum”, z. Miroslav Stanonik dhe përfaqësuesen për Shqipëri të po kësaj kompanie, znj. Violeta Gashi.

Gjatë takimit u bisedua rreth mundësisë për bashkëpunim në mes të UShAF dhe Kompanisë “Blum”, ku u dakorduan që në një të ardhme të afërt për institucionin tonë, kjo Kompani të jep donacion një makinë për hapjen e kanaleve për vendosje të aksesorëve, aksesor, mentesha, katalogje, etj. Po ashtu, Blum përmes përfaqësuesëve të vet do të bëjë edhe prezantime për stafin dhe studentët e UShAF për procesin e funksionimit të këtyre mekanizmave në lidhje më proceset në lëminë e përpunimit të drurit.

Rektori Bajraktari i falënderoi përfaqësuesit e “Blum” për dëshirën që të bashkëpunojnë me UShAF dhe i njoftoi me programet mësimore, të cilat lidhen me përpunimin e drurit, numrin e studentëve që posedojnë këto programe dhe me lëndët të cilat kanë të bëjnë me pjesën e mekanizmave të lartëshënuar.

Po ashtu, rektori u foli edhe për Bordin Industrial, i cili është pjesëë UShAF, si dhe për kompanitë më të mëdha në Kosovë, të cilat merren me përpunimin e drurit dhe janë pjesë e këtij Bordi. Po ashtu, theksoi edhe ndihmën që i ofron ky Bord Universitetit në pjesëmarrjen e vendimeve gjatë hartimit të planprogrameve të UShAF.

Ndër të tjera, rektori foli edhe për mënyrën e realizimit të praktikës së studentëve, si dhe për laboratorine përpunimit të drurit, i cili është në fazën finale të kompletimit.

Ndërsa, përfaqësuesit e Kompanisë “Blum”, falëndëruan rektorin për mikëpritjen dhe gatishmërinë për të bashkëpunuar, si dhe premtuan se do të jenë në bisedime që tëshohin mënyrën se si mund të ndihmojnë institucionin e vetëm të shkencave të aplikuara në Kosovë.

“Blum” është një kompani familjare që vepron në mbarë botën, e cila është e specializuar për prodhimin dhe shpërndarjen e pajisjeve: aksesorë, sistemet e ngritjes, sistemet e varëseve dhe sistemet e sirtarëve/pullave për mobilje – kryesisht për kuzhina. “Blum” ka shtatë zona prodhimi në Austri, si dhe vende prodhimi në Poloni, Brazil, SHBA dhe 28 filiale në mbarë Botën. Po ashtu, “Blum” është distributor në më shumë se 120 vende të Botës.

This post is also available in: English