Certifikohen studentët e UShAF për montim dhe shitje të mobileve

19 Dhjetor, 2018
Posted by: admin
Category: Fakulteti i Arkitekturës, Dizajnit dhe Teknologjisë së Drurit Fakulteti i Inxhinierisë dhe Informatikë Fakulteti i Menaxhimit Fakulteti i Turizmit dhe Mjedisit

Studentët e Universitetit të Shkencave të Aplikuara në Ferizaj (UShAF), të cilët ishin pjesë e trajnimit “Aftësimi Profesional i të Rinjve në Sektorin e Mobilerisë – Montim dhe Shitje”, u pajisën me certifikata nga Organizata “Prishtina Rea”, e cila në bashkëpunim me Ministrinë e Kulturës, Rinisë dhe Sportit bëri trajnimin e tyre.

Në këtë Ceremoni, Rektori i UShAF, Prof. Dr. Agron Bajraktari, u nderua me një Letër Falënderimi nga organizatorët për bashkëpunimin në aftësimin profesional të të rinjve dhe u shpreh i kënaqur që shumica e të rinjve pjesëmarrës në këtë trajnim, i cili u mbajt në vende të ndryshme të Kosovës, ishin nga Universiteti të cilin e përfaqëson ai.

“Ky projekt është i linjës që ne vazhdimisht e bëjmë me Ndërmarrjet në Kosovë, posaçërisht në qytetin e Ferizajt, i cili njihet si qyteti me industrinë më të zhvilluar në vend. Ne si Universiteti më i ri dhe me programe unike jemi të lidhur ngusht me bizneset dhe duke bashkëpunuar me to, studentët pjesën më të madhe të studimit e kalojnë duke bërë punë praktike, andaj kjo ka bërë që ne të zhvillohemi me hapa të sigurt dhe të ecim drejt suksesit”, tha Rektori.

Ndërsa, Ahmet Jetullahu, drejtor i Prishtina REA tha se me këtë projekt u përpoqën që të sjellin një model të ri të punës dhe për tregun në vend, duke shtuar se ishte kjo përpjekje praktike që nevojat e bizneseve të përballen me sfidat e të rinjve për t’ju qasur ballë-për-ballë vështirësive dhe të panjohurave të vendit te punës. Ai po ashtu theksoi se ishte ky një angazhim që orientohet në drejtim të ngritjes së indikatorëve të punësueshmërise së të rinjeve përmes aftësimeve sektoriale profesionale siç është Montimi dhe Shitja.

Në këtë ngjarje ishte i pranishëm edhe ministri i Kulturës, Rinisë dhe Sportit, z. Kujtim Gashi, i cili përveç tjerash tha se bashkëpunimi me Universitetin e vetëm të shkencave të aplikuara do të thellohet edhe më shumë në të ardhmen.