Arlind Ramadani fillon punë në profesionin e tij ende pa i mbaruar studimet

Arlind Ramadani, student i vitit të tretë i Arkitekturës së Interierit dhe Dizajnit të Mobileve në Universitetin e Shkencave të Aplikuara në Ferizaj, tashmë është punësuar në mobilerinë “Dekor”, me kërkesën e kësaj të fundit.

Ky është edhe kontakti i parë i Arlindit me tregun e punës dhe ai e vlerëson këtë si një fillim të mbarë të karrierës së tij në profesionin që ka zgjedhur dhe ku ndihet jashtëzakonisht mirë, sepse është profesion që vë në pah idetë dhe kreativitetin e individit.

Krahas studimeve, Arlindi është certifikuar për sistemin CNC dhe aplikacionin AutoCAD,  të cilat ai thotë se do t’i vazhdojë edhe më tutje, e ku mendon të avancohet edhe më shumë në këtë drejtim dhe në të ardhmën të fillojë të prodhojë vet.

“Gjithmonë më ka tërhequr vizatimi dhe dizajni, gjë që më bëri që unë të studioj në UShAF. Duke iu falenderuar Universitetit, që përveq mësimit teorik më ofroi edhe pjesën praktike, e cila më ndihmoi shumë që unë të zhvillohem në profesionin tim, tanimë kam hyrë në botën e dizajnit dhe besoj se do të kem një të ardhme të ndritur”, thotë studenti Arlind Ramadani.

“Dekor” është një kompani shumë e njohur në Kosovë, e cila bënë dizajnin e kuzhinave, dhomave të fëmijëve, tavolina, komoda të televizorit dhe shumë të tjera që janë të nevojshme për një ambient të rehatshëm familjar.