A po mendoni të vazhdoni studimet tuaja në Francë? Dëshironi të zbuloni programet që ofrojnë universitetet franceze apo të mësoni më shumë rreth mundësive për mobilitet akademik? Më 23 nëntor 2026, Instituti Francez i Kosovës hap dyert për një ditë kushtuar arsimit të lartë francez dhe bashkëpunimit universitar ndërmjet Francës dhe Kosovës.
E organizuar në kuadër të Turit të Ballkanit, kjo ngjarje do të mbledhë përfaqësues të disa universiteteve franceze, të cilët do të takohen me studentët dhe institucionet e arsimit të lartë në Kosovë. Ngjarjen do ta hapë z. Jean-François Huchet, Ambasador i Francës në Kosovë.
Panairi i studentëve për të zbuluar mundësitë e studimit në Francë (9:00–13:00)
Gjatë gjithë paradites, studentët dhe maturantët kosovarë do të kenë mundësinë të takojnë drejtpërdrejt përfaqësuesit e universiteteve franceze pjesëmarrëse. Ata do të mund të njihen me shumëllojshmërinë e programeve të studimit, të informohen rreth programeve akademike, kritereve të pranimit dhe mundësive të financimit, si dhe të parashtrojnë pyetjet e tyre e të diskutojnë me përfaqësuesit e universiteteve rreth planeve të tyre të studimit.
Pavarësisht nëse jeni nxënës i shkollës së mesme, student apo po mendoni të vazhdoni studimet jashtë vendit, ky panair do t’ju japë mundësinë të njiheni më mirë me mundësitë që ofron arsimi i lartë francez dhe të merrni informacione drejtpërdrejt nga institucionet përkatëse.
Takime institucionale për zhvillimin e partneriteteve universitare
Pasditja do t’u kushtohet takimeve ndërmjet përfaqësuesve të universiteteve franceze dhe homologëve të tyre kosovarë. Këto shkëmbime do të mundësojnë prezantimin e institucioneve, ndarjen e prioriteteve të tyre dhe shqyrtimin e mundësive të reja për bashkëpunim: partneritete ndërmjet universiteteve, shkëmbime studentësh dhe pedagogësh, projekte të përbashkëta akademike, si dhe zhvillimin e bashkëpunimit në fusha të ndryshme të studimit dhe kërkimit shkencor.
Kjo ditë është pjesë e përpjekjeve të Francës dhe Kosovës për të forcuar lidhjet në fushën e arsimit të lartë dhe për të nxitur shkëmbimet ndërmjet komuniteteve të tyre universitare.
Ju mirëpresim më 23 nëntor, nga ora 9:00 deri në 13:00, në Institutin Francez të Kosovës, për të takuar universitetet franceze dhe për të zbuluar mundësitë e studimit në Francë!