Sejdi Hoxha është Kryeshef Ekzekutiv në Ndërmarrjen Publike “Posta e Kosovës Sh.A”, i zgjedhur me 19.10.2012. Sipas detyrës zyrtare është edhe anëtar i Bordit të Drejtorëve të Postës së Kosovës.

Para zgjedhjes së tij si Kryeshef Ekzekutiv, Hoxha me vendim të Kryeministrit të Republikës së Kosovës ka qenë anëtar i Bordit të Drejtorëve në Aeroportin Ndërkombëtar të Prishtinës “Adem Jashari” (24.12.2008-2009).

Në periudhën kohore 23.04.2009 – 2012, ka qenë kryetar i Bordit të Drejtorëve të Ndërmarrjes Publike “Hekurudhat e Kosovës”. Pas ndarjes së “Hekurudhave të Kosovës” në dy Ndërmarrje, Hoxha është emëruar Kryesues i Bordit të Drejtorëve të Ndërmarrjes Publike “Infrastruktura e Hekurudhave të Kosovës Sh.A”.  Në këtë pozitë ka punuar nga 2012 deri më 2013.

Më 22.05.2009 është zgjedhur asistent në Universitetin e Prishtinës, respektivisht në Fakultetin e Shkencave Teknike të Aplikuara në Ferizaj. Pastaj, më 20.11.2009 z. Hoxha është zgjedhur Koordinator i ECTS dhe Zhvillimit Akademik. Ndërsa, më 31.10.2011 zgjedhet Shef i Departamentit të Menaxhimit Industrial.

Tani z. Hoxha është Ligjërues në Universitetin e Shkencave të Aplikuara në Ferizaj. Ai ka ligjëruar edhe në Kolegjin Universitar “Tempulli” nga 16.02.2010 deri në vitin 2012.

Hoxha ka diplomuar në Universitetin e Prishtinës në Fakultetin e Inxhinierisë Mekanike. Në Universitetin e Prishtinës ka përfunduar edhe studimet postdiplomike- Master.

Në vitin 2016 ka përfunduar studimet postdiplomike – Master edhe në Kolegjin “Universum”, ne lëmin e Menaxhimit. Tani z. Hoxha është në përfundim të studimeve të doktoratës në Universitetin Shtetëror “Nigde” në Turqi.

Hoxha flet gjuhen angleze si dhe posedon edhe njohuri të gjuhës turke.