Shoqata e Hotelerisë dhe Turizmit “Pro In” ka mbajtur ligjëratë për studentët e Fakultetit të Turizmit dhe Ambientit

Përfaqësues të Shoqatës së Hotelerisë dhe Turizmit në Kosovë “Pro In”, z. Afrim Fushtica, kryetar i Shoqatës, z. Xhevdet Hyseni, drejtor ekzekutiv i Shoqatës, dhe z. Visar Demolli, koordinator për të rinjt i kësaj Shoqate, mbajtën ligjëratë për studentët e Fakultetit të Turizmit dhe Ambientit të Universitetit të Shkencave të Aplikuara në Ferizaj (UShAF).

Qëllimi i kësaj ligjërate, të organizuar nga mësimdhënësja e UShAF, Prof. As. Dr. Alberta Tahiri, ishte që të filloj bashkëpunimi në mes të Shoqatës dhe Universitetit për gjetjen e praktikave për studentët, si dhe organizmin e vizitave studimore në vende të ndryshme të cilat luajnë rol të rëndësishëm në zhvillimin e turizmit në Kosovë.

Përfaqësuesit e Shoqatës “Pro In”, para studentëve prezantuan karrierën e tyre, eksperiencat dhe aftësitë e tyre në fushën e turizmit dhe hotelerisë.

Z. Fushtica foli për historikun e themelimit dhe të arriturat e kësaj Shoqate, njëherit u shpreh i habitur nga numri i studentëve pjesëmarrës në ligjëratë e sidomos nga prania e madhe e gjinisë femrore në këtë Fakultet.

Ndërsa, Z. Hyseni, foli për klasifikimin dhe kategorizimin e hoteleve, si dhe shprehi gatishmëri për mbështetjen e studentëve në organizimin e eventeve të ndryshme, si dhe ofroj mbështetje në organizimin e praktikave në Kosovë dhe Shqipëri.

Shoqata e Hotelerisë dhe Turizmit “Pro In”, ka rol këshillues dhe promovues të turizmit dhe misioni i saj është zhvillimi i hotelerisë në Kosovë.