Marrëveshje Bashkëpunimi në mes të UShAF dhe Universitetit “Sancti Cyrilli”, të Maltës

Rektori i Universitetit të Shkencave të Aplikuara në Ferizaj (UShAF), Prof. Dr. Agron Bajraktari së bashku me profesorin, Prof. As. Dr. Hysen Sogojeva,  kanë marrë pjesë në një takim në  Tiranë, ku ishin të pranishëm personalitete të ndryshëm nga bota në fushën akademike dhe kulturore.

E veçantë e këtij takimi ishte nënshkrimi i Marrëveshjes së Bashkëpunimit në mes të Rektorit Bajraktari dhe Rektorit të Universitetit “Sancti Cyrilli” (USC) të Maltës, Prof. Alfred Josef Baldacchino.

Rektori Bajraktari falënderoj Rektorin e Universitetit “Sancti Cyrilli” dhe u shpreh i kënaqur që bashkëpunimi dhe Marrëveshjet e shumta me Universitete Ndërkombëtare po i shtohen UShAF-it.

Ndërsa, Rektori i USC u shpreh i kënaqur nga nënshkrimi i kësaj marrëvshje dhe me qëllim të thellimit të këtij bashkëpunimi e ftoi Rektorin Bajraktari që në një të ardhme të afërt të vizitojë këtë Universitet.

Marrëvshja ka për qëllim shkëmbimin e stafit akademik dhe studenteve, pjesëmarrje të përbashkëta në shkolla verore, punëtori dhe trajnime të ndryshme të cilat i organizojnë institucionet. Po ashtu, zhvillimin e projekteve të përbashkëta, seminare për studentë dhe alumni, konferenca, mësim nga distanca dhe aktivitete të tjera të rëndësishme.

Rektori Bajraktari, zhvilloi takime të ndryshme dhe njëri ndër ta ishte takimi edhe me Rektorin e Universitetit të Vlorës “Ismail Qemajli”, Prof. Dr. Roland Zisi, me të cilin biseduan për mundesitë e bashkëpunimit në mes të dy Universiteteve. Po ashtu, u dakorduan që në një të ardhme të afërt të draftojnë një Marrëveshje dhe ta finalizojnë me nënshkrimin e saj.