Universiteti i Shkencave të Aplikuara në Ferizaj është shpallur fitues dhe partner në dy projekte të rëndësishme ndërkombëtare në kuadër të programit Erasmus+ të Bashkimit Evropian, duke u rreshtuar përkrah universiteteve dhe institucioneve prestigjioze të arsimit të lartë nga Evropa, Afrika dhe Azia.

Projektet në të cilat universiteti ynë është shpallur fitues janë:

• Forcimi i Qeverisjes dhe Kapacitetit Profesional të Sigurimit të Cilësisë në Arsimin e Lartë;
• Ndërtimi i Kapaciteteve Arsimore për Përdorimin e Inteligjencës Artificiale.

Këto projekte trajtojnë dy nga prioritetet më të rëndësishme të zhvillimit të arsimit të lartë në Evropë: garantimin e cilësisë institucionale dhe integrimin e inteligjencës artificiale në proceset e mësimdhënies, të të nxënit dhe të zhvillimit të kapaciteteve akademike.

Në kuadër të këtyre projekteve, Universiteti i Shkencave të Aplikuara në Ferizaj do të bashkëpunojë me institucione të arsimit të lartë nga Franca, Spanja, Letonia, Portugalia, Egjipti, Jordania, Shqipëria dhe Kosova, duke zgjeruar më tej rrjetin e bashkëpunimit ndërkombëtar dhe duke krijuar mundësi të reja për studentët, stafin akademik dhe zhvillimin institucional.

Ky sukses përfaqëson një vlerësim të pavarur ndërkombëtar për cilësinë e punës sonë akademike, kapacitetet profesionale të stafit dhe besueshmërinë që universiteti ynë gëzon në rrjetin evropian dhe ndërkombëtar të arsimit të lartë. Ai dëshmon se universiteti ynë është një partner i besueshëm për Bashkimin Evropian dhe për universitetet më të njohura ndërkombëtare.

Është paradoksale që, ndërkohë që Bashkimi Evropian dhe partnerët tanë ndërkombëtarë zgjedhin të investojnë në zhvillimin e Universitetit të Shkencave të Aplikuara në Ferizaj përmes programeve konkurruese Erasmus+, në nivel vendor po ndërmerren veprime që rrezikojnë ekzistencën dhe funksionimin e këtij institucioni.

Fitimi i këtyre dy projekteve dëshmon se universiteti ynë nuk është një institucion që duhet të mbyllet, por një universitet që prodhon rezultate konkrete, gëzon reputacion ndërkombëtar dhe kontribuon në zhvillimin e arsimit të lartë në Kosovë. Ky sukses është rezultat i punës dhe përkushtimit të stafit akademik dhe administrativ, i mbështetjes së partnerëve tanë ndërkombëtarë dhe i angazhimit të vazhdueshëm për të ofruar arsim cilësor sipas standardeve evropiane.

I bëjmë thirrje institucioneve përgjegjëse që vendimet për të ardhmen e Universitetit të Shkencave të Aplikuara në Ferizaj të bazohen në standarde akademike, rezultate të matshme dhe interesin publik. Pikërisht projektet e fituara në kuadër të Erasmus+ dëshmojnë se universiteti ynë ka kapacitetet profesionale, reputacionin ndërkombëtar dhe potencialin për të qenë një faktor i rëndësishëm në zhvillimin e arsimit të lartë dhe inovacionit në Kosovë.

Shprehim mirënjohjen tonë për Bashkimin Evropian, për të gjithë partnerët tanë ndërkombëtarë dhe për stafin akademik e administrativ, të cilët me profesionalizmin dhe përkushtimin e tyre bënë të mundur këtë arritje të rëndësishme.

Pavarësisht sfidave me të cilat po përballemi, Universiteti i Shkencave të Aplikuara në Ferizaj do të vazhdojë të punojë me përgjegjësi për studentët e tij, për zhvillimin institucional dhe për forcimin e bashkëpunimit ndërkombëtar. Rezultatet që po arrijmë në arenën evropiane janë dëshmia më e mirë se universiteti ynë ka të ardhme, ka potencial dhe meriton të mbështetet e të zhvillohet.